هل برشلونة يخاف من بايرن أو العكس؟

 هل برشلونة اللي لازم يخاف من بايرن ولا العكس؟

الحقيقة، بعد يوم دسم كرويًا، قولت دي فرصة كويسة تكون فيه سهرة كروية دسمة برده وأرجع للتحليلات التفصيلية من جديد بعد فترة راحة،

والحقيقة كمان، أنا كنت مقرر إني مش هتكلم عن برشلونة غير بعد فترة لأسباب كتير أهمها إني عايز أشوف تشافي هيشعّب أفكاره ازاي بعد كل الإنتدابات دي، لكن بمَ إني هتكلم، فهتكلم بشكل تفصيلي شوية وهطلع فيه من المضمون الأصلي كتير وهفتح زوايا للكلام كتير، فنتكلم براحتنا بقى،

فكالعادة، حضّر قهوتك وتعالى إقرأ!

قولًا واحدًا وقبل أي حاجة، أي فريق مهما كان قوي، مش بيحب يلعب في مجموعة أو منافسة بشكل عام بتضمن منافسين أقوياء، الكلام هنا عام،

مثلًا أقوى نسخة فريق شوفتها في حياتي، برشلونة جوارديولا، في 2011 لما كان نصف النهائي بيتضمن برشلونة وريال مدريد ومانشستر يونايتد وشالكه، يعني نصف نهائي قوي، بيب جوارديولا لما إتسأل عن المنافسة دي قال لو يقدر يحول نصف النهائي ده لأضعف 3 فرق في العالم معاه هيعمل كده رغم إن برشلونة كان فريق مرعب، وده المنطقي،

دي زاوية أولى للكلام، الزاوية التفصيلية بقى، برشلونة فريق مشاكله كانت بين السطور، وهي دي الأزمة وكانت السبب الأول في إن منهجية هدم ما سبق وبناء مشروع قوي زي دلوقتي ياخد وقت لحد ما يبدأ، لأن برشلونة في 2019 مثلًا كان يبدو نظريًا فعلًا فريق قوي ولا تشوبه شائبة؛

فريق فيه ميسي بأقوى فتراته على الإطلاق، مهاجم زي سواريز، خط هجوم فيه خيارات كتير زي مالكوم وديمبلي وكوتينيو، نصف ملعب فيه كل الخصائص، الهداف زي باولينيو والشامل زي فيدال والهادي زي راكيتيتش والذكي زي بوسكيتس، وخط دفاع بيتصرف عليه سنويًا علشان يبقى قوي، وحارس عملاق زي تير شتيجن،

لكن الفكرة فعلًا، إن مشكلة برشلونة كانت مش في إن كل اللي قرأته ده عبث بس، لأن ده بالظبط الكلام السطحي اللي بارتوميو كان فاكره صح، وكان بيصرف مبالغ طائلة ومرتبات عبثية على أساسه، مشكلة برشلونة الأولى كانت في إن الفريق ده أفراده أصبحوا بيشككوا في نفسهم، القصة بدأت من روما مرورًا بليفريول ثم بايرن اللي كانت قشة قطمت ظهر البعير فعلًا،

ثم خلاص، برشلونة اللي بيكسب الكبار إنتهى، فكان الصح، هو هدم كل ده حتى لو لسه البطارية فيها شوية شحن، حتى لو كنت رافض فكرة بعض الأفراد اللي خرجوا وكنت شايف إن فيه عناصر تانية أولى بالخروج قبلهم، فسواريز وفيدال وراكيتيتش وباولينيو ولينجليه وغيرهم كان لازم يخرجوا فعلًا،

- الفكرة هنا ايه؟ نفسية في المقام الأول، الفريق ده أفراده أصبحوا بشخصيات ضعيفة، مفيش أي أمل فيهم، حتى اللي عملوه في كاريرهم مش هيحركهم، مش لأنهم بس ضعاف ويستحقوا اللي حصلهم خصوصًا القوام الكتالوني نفسه اللي هم كباتن برشلونة دلوقتي، لكن كمان لأنهم فعلًا أصبحوا حطام تام إتهزوا من جذورهم بعد الكوارث دي كلها.

بعد كل ده، برشلونة بيقابل بايرن مرة كمان في مجموعات الموسم الماضي، علشان يخسر الماتشين تاني، مش بس لأنه أضعف، لكن لأنه نازل خسران، طبيعي جدًا، ويروح يوروباليج كمان، حاجة محدش كان يتوقع حدوثها مهما الفريق ده كان ضعيف، مش بس كده،

بل المضحك المبكي في نفس الوقت إن جماهير الفريق نفسهم قالوا أيوه نروح يوروباليج لأن ده مستوى الفريق، خد البطولة دي وإبني مشروعك بعيد عن الكبار أحسن ما تخسر منهم تاني.

الفصل التاني في القصة؛

قدوم تشافي واللي عمله كان بمثابة الإحياء بعد الموت، كلامي هنا مش upgrade حصل للأفراد أبدًا ولا ده أهم شيء حصل حتى، كلامي هنا عن شخصية النادي ده، شباب صغيرين أو خلينا نقول أطفال، بيعملوا اللي الكبار أصبحوا مش قادرين على فِعله، وعلشان كده لحد دلوقتي شايف إن اللي عمله تشافي لم يأخد حقه،

مش لأنه قدم طفرة بس، لكن لأنه قدم طفرة بمعطيات شبه معدومة وبشكل دقيق جدًا وسريع جدًا، ده موضوع مش منطقي لأنه ملوش وصفة معينة، يعني حتى لو برشلونة فريق جاهز وتشافي إستلمه وهو كويس ومش ناقصه غير شوية حاجات بسيطة،

فمفيش وصفة معينة تقدر تعملها علشان 'تشعّب' أفكارك بالدقة والسرعة دي، وهي دي المشكلة اللي بتكلم فيها، إنه أول ما راح كان في فريق ذهنيًا مش موجود، فنيًا مش بس عنده نواقص، بل إنه لا يملك إلا شوية أطفال بقوا مرة واحدة وبدون مقدمات في وجه المدفع بدون بطل يسندهم شوية، وحتى لا يملك الماديات ولا المركز الكويس ولا ميسي اللي كانوا السبب في إن اللاعب الجديد يروح برشلونة،

يعني مفيش فلوس ولا فيه مركز مناسب حتى لو فيه فلوس، ولا فيه ميسي حتى لو فيه فلوس ومركز مناسب، ومش بس كده بقى، المشكلة إنك حتى مش مستلم الفريق من أول الموسم والمفروض هتشعّب أفكارك بشكل طبيعي زي أي مدرب جديد ما بيعمل مع فريقه الجديد،

كل دي معطيات كانت مش موجودة علشان برشلونة يوصل للشكل اللي يخليك كمشاهد مش بس كمشجع مش عارف تمدح مين ولا مين علشان الكل مميز،

ولا سبب منطقي حتى إن حتى ريكي بويج اللي ملعبش من أول الموسم ينزل في ماتش أتليتك بلباو مثلًا الموسم الماضي تعبيرات وشه كلها بتقول إنه عايز ياكل النجيلة وياكلها فعلًا وفريقه كسبان 4 قبل ما ينزل، ولا يخليك كبرشلونة بقيت منظومة بسيستم مُحكَم وبأنماط لعب صعب ينفذها أي فريق جاهز،

- وبالتالي، وجب التوضيح، المشروع الرياضي لأي فريق كورة في العالم اللي بيمر بتخبطات وأزمات كبيرة، بيمر بـ3 مراحل؛ الأولى والأصعب هي نقطة التحول، إنك تكسب كتير بأداء وهيكلة مميزين، الثانية هي مرحلة الإيمان، إن اللاعبين دول يصدقوا نفسهم، الثالثة هي مرحلة الرجوع، إنك بتقوّي نفسك كجودة بالإنتدابات حسب مشروع ونظرة المدرب وأنماط لعبه اللي أنت وثقت فيه،

أهم نقطة مر بها تشافي واللاعبين دول هي الـturning point، أو نقطة التحول، إنك بقيت بتكسب كتير بشكل متتالي بأداء وهيكلة تقدر تبني بهم للمستقبل، مشروع حقيقي بشوية أطفال، عيال صدقت نفسها وبيضربوا بالمنطق عرض الحائط، عامل نفسي بحت قبل أي شغل فني،

ده شيء لم يحدث مثلًا لآرتيتا مع أرسنال كل الفترة اللي فاتت قبل الموسم ده، كل ما يبني هيكلة حقيقية كانت بتتضرب بسرعة بخسارتين مثلًا بعد مكسبين متتاليين لأنه في البريميرليج، الدوري اللي بلا رحمة، عكس دلوقتي، بعد ما اللاعبين صدقوا نفسهم وآمنوا بمدربهم وشخصيتهم تقلت في وقت صغير،

ومن هنا تم الانتقال لمرحلة أكبر لبرشلونة وهي مرحلة الإيمان بقى، لما دي حصلت، برشلونة لعب ضد أتليتكو وريال مدريد وأتلتيكو وفالنسيا وبلباو وجالاتاسراي ونابولي، وكسب كل دول أربعات، خلاص هم بقوا مؤمنين إنهم يقدروا يعمل كل حاجة عايزينها، وتشافي هو العامل الأول في ده،

بالتالي لما كسب المرحلة دي كمان وصل للمرحلة اللي هو فيها دلوقتي، واللي كان بسببها كل التعاقدات دي رغم إن اللي موجودين كانوا مميزين، مرحلة الرجوع للمكانة، مرحلة لو عندي لاعب كويس ببدله بلاعب ممتاز، ولو عندي لاعب ممتاز بحاول أبدله بلاعب مفيش في مكانه أفضل منه غير 2 في العالم كله،

وعلشان نحكي هنا بقى، محتاج تركز أكتر،

أهم حاجة حصلت وبتحصل دلوقتي لبرشلونة، إن برشلونة الضعيف إنتهى، إنسى إنك تقابل برشلونة وتنهش في لحمه زي السنين اللي فاتت، كلامي هنا للمرة الثانية مش عن الـupgrade اللي حصل وبيحصل وهيحصل لإسكواد الفريق، نفس الكلام بالظبط يتقال عن برشلونة لو كان كمل بنفس لاعبيه الأطفال الموسم الماضي،

السؤال الوجيه هنا بقى، طيب ليه برشلونة بيتعاقد مع كل اللاعبين الجدد بل وليه بيبيع من أصوله علشان يعمل كل ده رغم إن عنده لاعبين مميزين فعلًا؟ علشان مرحلة الرجوع للمكانة دي بتتطلب إنك تكسب الخصوم الأقوى جودة منك، حتى لو عندي أوباميانج وديباي المميزين هتعاقد مع ليفاندوفسكي ورافينيا المميزين أكتر،

حاجة هنا على الهامش علشان اللي شايف إن برشلونة كان مبالغ في صفقاته في الصيف، أرسنال عامل أداء وتسلسل مميز ومبهر مع آرتيتا، لكن مازلت بشوف إن اللي ناقص أرسنال جودة بس، آرتيتا عنده قناعة وهي just trust the process، الوثوق بس في العملية والهيكل والأسلوب،

وأنا عُمري ما كنت متفق مع الرؤية دي، يتحسبله طبعًا إنه كويس لحد دلوقتي بالفكرة دي، لكن لما ندخل في الموسم أكتر، فعلشان تتغلب على الكويسين لازم تبقى كويس أكتر منهم،

جوارديولا بيـtrust the process برده بس عنده حاجة كده إني هصرف، هصرف، هصرف.. واللي يقول يقول، حتى لو انا شخصيًا بختلف معاه في النقطة دي في أمور كتير، لكن في النهاية؟ هو بيكسب عشان أدواته أفضل وبيطورها حسب رؤيته وشغله قبل عبقريته وأسلوبه والهوية الهجومية وهذا الصدد،

مثلًا، مش مختلف مع فكرة زينتشينكو لأسلوب آرتيتا أبدًا، خيسوس اللي عامل موسم عبقري، لكن هو جايبهم عشان كده بس، مش لرفع الجودة في المقام الأول، الكلام ده عن كل صفقات أرسنال تقريبًا، الفلوس اللي بتتدفع فيهم وإتدفعت فيهم قبل كده لسنين كتير حتى مع آرتيتا نفسه كانوا ممكن يجيبوا بيها صفقات أفضل من حيث الفعالية، الحضور، الجانب الفردي، اللاعب اللي بيخلص هجمة لوحده وقت ما التكتيك يكون مش نافع في موقف ما.

بالتالي هنا وجب التوضيح، برشلونة مش بيعمل كل اللي بيعمله ده علشان يرجع فريق كبير نفسيًا وثقته في نفسه تزيد، هو رجع بقاله موسم، لكن هو دلوقتي بيعمل كل ده علشان هو لازم يعمل كل ده،

سؤال تاني وجيه، ولما عمل ولسه هيعمل كل ده؟ يبقى السيناريو هنا تحول 180 درجة، الكلام بتاع بايرن هيكسب برشلونة تاني ده عبث، مش لأن ده مستحيل يحصل، لكن لأنه مش أكيد هيحصل، الفريقين أصبحوا في نفس القوة تقريبًا، بل في رأيي الشخصي فيه بعض المراكز برشلونة بيتفوق فيها بكل وضوح،

وفيه نقطة هنا وجب إيضاحها برده، في الوقت اللي الكل بيعاني فيه من وجود مواهب سنهم صغير ضمان إنهم يكونوا كويسين أصبحا إحتمالية قليلة، وحتى اللي سنهم صغير بجودة عالية أصبحوا قليلين، برشلونة عنده حاجة مختلفة وهي اللامسيا، اللي عمرها ما كانت مشاركة في ضعف المواهب دي عالميًا مهما كان وضعها،

بل إن برشلونة دلوقتي حالًا عنده منجم ذهب مش موجود في العالم كله، برشلونة عنده 2 واعدين في خط الدفاع، 3 في الوسط غير المميزين، 3 في الهجوم مميزين، غير المواهب اللي في اللامسيا،

الكلام ده في الوقت اللي ليفربول فيه بيُعاني من قرابة إنتهاء جيل كلوب التاريخي في النادي، بايرن ميونخ مثلًا، يوفنتوس، واللي ريال مدريد ومانشستر سيتي إتجهوا للنقطة دي بوضوح في الصيف ده، ممكن تعترض على أسعار تشاوميني أو بنسبة أقل هالاند أو أنتوني لليونايتد أو أيًا كان، لكن هو ده الصح، لأن إحتمالية وجود غيرهم بنفس الجودة والحضور مش كبير.

الفصل الثالث في القصة، والخاص بتشافي؛

حتى الآن وبكل صراحه، أنا مش معجب مع بعض قناعات تشافي في الموسم ده، على تويتر أنا بنتقده كتير فعلًا؛ مش عاجبني فكرة آراوخو ظهير أيمن، نقلة رافينيا المستمرة على اليسار بدون جدوى، توظيف دي يونج البعيد تمامًا عن خصائصه، عدم وجود بديل لبوسكيتس رغم إعترافي بأهميته،

عدا ذلك، عاجبني جدًا إدارة تشافي للمباريات حتى الآن، هحكي حاجة واحدة كمثال لحد ما أتكلم عن برشلونة تكتيكيًا تفصيلًا في القادم، مباراة برشلونة وريال سوسيداد في الأنويتا،

تشافي كالعادة مش بيحب يفتح ملعبه بالأظهرة، بيشوف إن دورهم في الإستحواذ والحيازة والتصدي للمرتدات أهم، وعلشان كده هو مقتنع بآراوخو في المركز ده، بالتالي بيفتح ملعبه بالأجنحة، توريس وديمبلي، توريس للربط بين الخطوط ولأنه شايف إن دوره بدون الكورة في الضغط العكسي كلاعب قريب من الخصم أكتر من نصف الملعب أكتر، وديمبلي فاتح الطرف،

لحد هنا الشكل كان مش عاجبني كإستخدام لأدواته، خصوصًا إن سوسيداد عمل switch off لملعبه بالكامل عرضيًا، الإرتكاز بيسقط بين القلبين والظهيرين قافلين في الخلف وواحد من جناحي سوسيداد بيسقط حسب جبهة برشلونة اللي بيهاجم منها والتاني منتظر للمرتدة، وبيتبدلوا تباعًا حسب المكان اللي بيهاجم منه برشلونة،

تشافي إتدخل، لعب برافينيا، خرج الظهير الوحيد اللي ممكن يفتح الطرف، بالدي، علشان يلعب بعدد مدافعين أكتر يتصدوا لأي محاولة مرتدة، قبله كمان دخل فاتي مكان توريس بنفس الدور لكن في نصف المساحة اللي بين ظهير سوسيداد اليمين وقلب الدفاع لأنه شاف إنها أضعف ومساحتها أكبر، وليفاندوسكي معزول في الأمام وبيضطر يسقط كتير من منطقته علشان اللعب يوصله،

النتيجة؟ فتح الملعب، زيادة عددية هجومية لبرشلونة حسب هيكلة مميزة، عدم عزل ليفاندوفسكي، رافينيا دوره يصنع أكتر من المنطقة الضعيفة، فاتي بيسجل بسرقته للمساحة من نفس المكان، بل إن تشافي قرر يزوّد المعدل وينزل ألبا مكان ديمبيلي علشان يهاجم أكتر، علشان يسجل 3 أهداف من بداية تدخله لإدارة المباراة.

الكورة أصبحت في ملعب تشافي دلوقتي، إدارته هي اللي هتحدد كل حاجة، أنا واثق فيه، مش علشان كان بيكسب أو لسه بيكسب، لكن لأني بشوف برشلونة ماشي بدراسة فعلية من بداية لابورتا وأليماني مرورًا به هو حسب هيكلة فعلية، الكل عارف شغله بنسبة 100%، فخلينا نشوف! إنتهى المقال.