سلسلة من أجمل القصص 1 : كيف تتغلب على الصعاب لكي تكون مع من تحب

يللا هي جت علينا 😂❤

ازيكم؟؟

انا ياسمين و ده جوزي هو ارجنتيني مش مصري.. طبعا لما اي حد هيقرا انه مش مصري اول حاجة الفضول هيشدك تسأل عرفتو بعض ازاي؟؟

القصة بدأت غريبة جدا
بما اننا احنا الاتنين قلابيظ 😂😂
يبقى احنا الاتنين بنحب الاكل .. و من هنا بدات القصة 😂

كنا مشتركين انا وهو في بيدج ياباني ع الفيس بوك بتبيع نودلز و حلويات ياباني و شيبسيهات بتشحن لكل دول العالم واسعارها حلوة يعني و كنت نفسي اجيب منها و دايما مترددة ف كنت بدخل اتفرج عالريفيوز بتاعة الناس و الكومنتات
و بالصدفة بتفرج على البوست شوفته عاملهم ريفيو و شكله دايما بيشتري منهم يعني لانه بيشكر في كذا منتج
دخلت كتبتله كومنت سألته هي بجد الحاجات دي كويسة واني هموت واجربها ..

و عادي كتبت و نسيت يعني و مرت ساعات و نمت وصحيت
لقيته باعتلي برايفت بيقوللي انه اسف مفهمش الكومنت بتاعي عشان هو بيتكلم اسباني بس..
فتحت جوجل ترانسليشن و بعتله سؤالي بالاسباني
رد عليا و على اسالتي 😂

بعدها لقيته كلمني تاني اتاري اللئيم قلب في صفحتي و عرف اني مصرية ! 😃
كلمني و قاللي قد ايه هو بيحب الحضارة المصرية و انه مبهور بيها و بتقرا عنها و كان بيدرسها في التاريخ في المدرسة زمان وهو صغير ..
الكلام بدأ يجيب بعضه و بقينا صحاب جدا.. و بقيت اعلمه انجليزي عشان نتكلم موبايل كمان و فيديوز و افرجه على الشوارع و الاماكن الاثرية
بقينا 24 ساعة بنتكلم مع بعض جدا
و فجأة قاللي انه بيحبني و عشان هو عارف اني عربية و ان احنا عندنا الحب اخره جواز طلب يتجوزني ❤

بس كان في عائق!! اني مسلمة وهو كاثوليكي و طبعا مع اختلاف الاديان لا الدين ولا البلد هتسمح بالجواز ده
انا اعترفتله ان انا كمان بحبه بس ده العائق الوحيد..

لقيته من نفسه ابتدا يتعلم عن الاسلام وحبه جدا و بدا يقرا و طلب انه يبقى مسلم واني اعلمه الصلاة و القران و ان هما برة مصر معندهمش اهتمام بالديانات زينا لدرجة انها مش مذكورة في الاوراق الرسمية بتتعامل هناك معاملة الحرية الشخصية فبالتالي هو مكانش يعرف حاجة عن دينه اللي فات ف حب دينه الجديد جدا و مقتنع بيه كليا ❤

كان فيه عائق تاني.. ان لازم عشان يسافر ويجي يتجوزني و يطلب ايدي محتاجين مصاريف من اول السفر لحد الشبكة والذي منه 😃

كنت خلاص قربت افقد الامل مع اني بحبه جدا.. !
صحيت من النوم لقيته باع العربية بتاعته وفضل رايح جاي 10 شهور مرمطة فالاتوبيسات عشان الفلوس دي تعمل اي ربح فالبنك حتى لو قليل ❤❤

وفاتت شهور كتير و فالاخر جه و بغض النظر عن البهدلة و المرمطة في المصالح الحكومية عشان نعمل ورق الجواز.. الا اننا في الاخر اتجوزنا و بقالنا شهر بس متجوزين ❤❤❤

معملناش فرح عشان الفلوس اللي معانا تكفي اكتفيت بشهر عسل مش شهر اوي يعني 😂😂

سافرنا مع بعض الاقصر و اسوان و الجيزة طبعا عشان الاهرامات واهو ضربنا عصفورين بحجر لانه كان نفسه جدا يشوف تاريخ مصر .. ❤

و كان هو ليا عوض ربنا فعلا عن كل اللي حصللي في حياتي زمان و عن كمية الظلم اللي اتعرضتله و الضرر النفسي و الندالة من اقرب ناس ليا انا حرفيا كانت حياتي صعبة جدا كنت شبه مكسورة و وحيدة بقى هو ليا كل حاجة.. ❤

و لما لقيتكم بتحكو قصصكم شدني جدا احكيلكم انا كمان
و اهو بالمرة يمكن نكسب و نروح دهب 😃❤